تروح السجل المدني اللى انت تابع ليه وتطلب استخراج (قيد عائلي) ودي شهادة موثقة ومختومة وبعلامة مائية مكتوب فيها اسم والدك ووالدتك واسماء الابناء (انت واخواتك الاناث)
وهما يطلبوا منك المستندات دي في السجل المدني (صورة شهادة زواج او طلاق والدك ووالدتك - صورة بطاقة والدك - صورة بطاقة والدتك - صورة بطاقتك - صور بطاقات او شهادات ميلاد كل أخواتك الاناث)
بعد ما تملأ الاستمارة وتقدم صور المستندات المطلوبة بتاخد ايصال وتروح تستلم القيد العائلي بعد 5 أيام تقريبا أو حسب ما الموظف يقولك
بعد ما تاخد القيد العائلي تطلع على منطقة تعبئة التجنيد اللى انت تابع ليها ومعاك (القيد العائلي + بطاقتك + الرقم الثلاثي (6 جند) ) والرقم الثلاثي اكيد معاك او اكيد الكلية طلبته منك عشان اجراءات التأجيل ..ولو مش معاك هو بيتجاب من قسم الشرطة اللى انت تابع ليه المهم تروح التجنيد معاك القيد العائلي والرقم الثلاثي وتشتري الاستمارة المطلوبة وتملاها وتسلم القيد العائلي وصورة بطاقتك وبرضه هتاخد ايصال تستلم بيه الاعفاء وبتكون يا اما في اخر اليوم الساعة 2 لو انت رايح بدري ع الساعة 8 او بتاخدها تاني يوم والف مبروك عليك
ملحوظات عرفتها برضه اكيد هتفيدك
الاعفاء اللى انت هتاخدها اسمها اعفاء مؤقت وهتجدد كل 5 سنوات لحد ما تتم سن ال 29 سنة بعدها تاخد اعفاء نهائي
في حالة سفرك للخارج لازم برضه تطلع تصريح سفر حتي بعد الاعفاء المؤقت ...لكن لما تاخد الاعفاء النهائي بتروح الجوازات وتعدل الباسبور وتاخد الختم البيضاوي بتاع غير مطلوب تجنيديا وبعدها تقدر تسافر من غير تصريح سفر