حكايات ثورية - اخر الاخبار - نشرة اخبار الفيس بوك

عارفين مين ده ؟؟
ده علاء بشندي رئيس مباحث قسم البساتين و لقبه جلاد التعذيب
الصورة دي كنت انا واعضاء حملة في حب مصر في مدرسة بالمنيل اثناء الاشراف علي تعديل الدستور ايام المجلس العسكري ... طبعا ساعتها كانت الاقسام كلها محترقة فكانت المدارس اقسام مؤقتة للظباط لحين اعادة ترميم الاقسام و طبعا علاء بشندي كان له فصل داخل المدرسة عامله مكتب وهو المتصورين بداخله و فصل تاني معمول تخشيبة مؤقتة .. المهم عشان مطولش عليكم احنا كان لازم ناخد موافقة للاشراف عالدستور من المقدم علاء وكان الموضوع هياخد نص ساعة قبل توافد الجماهير للاستفتاء و قعدنا في مكتبه و تبادلنا الحديث وكنت ساعتها انا سخنة في الكلام اوي ( ايام ماكنت ثورجية بقا ) وقعدت اهاجمه و اقوله انت لقبك الجلاد و بتعذب المواطنين وربنا جابلنا حقنا .. وهو يبصلي و يبتسم ويقولي انتوا مش فاهمين حاجة ومش عارفين الشرطة حايشة عنكم ايه ؟؟ قلتله ايوة طبعا هتقولي بقي انكم بتطهروا الوطن من الاعداء و معرفش ايه ؟؟ لا يا استاذ انتوا بتلموا عاطل ×باطل و بتظلموا ناس بريئة في النص ... المهم انا فضلت اهاجم وهو يدافع لغاية ما دخل علينا عسكري و قاله يا باشا اتفضل عشان المتهم وصل وقام علاء بشندي دخل المكتب اللي جنبنا وانا طبعا قومت وراه عايزة اشوف واراقب من بعيد هيعملوا ايه في المتهم ده ... بصيت لقيت راجل عمره حوالي 55 سنة و مضروب لما معمي و علاء بيقوله هتعترف ولا اخليها تكمل عليك و تقتلك ؟؟ بسرعة دخلت المكتب المعمول تخشيبة وانا في قمة الثورة و قعدت ازعق و اقوله يعني اللي بيتقال عليك مظبوووط ؟ انت بتهدد الراجل بالقتل كدة عيني عينك ؟؟؟ انا هوديك × ستين داهية ... طبعا اعضاء حملتي كلهم جم ورايا بسرعة ومش فاهمين حاجة وانا قعدت اقولهم اتفرجوا عالبيه الظابط بيهدد مواطن بالقتل حتي لو متهم مش من حقه يهدده !!! بصيت لقيت علاء بشندي قرب جنب ودني وقالي الراجل ده بنته حامل منه واغتصبها عدة مرات و برشامجي واللي ضربه كدة امها والست مستنية برة في حراسة الشرطة ولو سيبتها عليه هتقتله وانا بهدده بيها !!! .. طبعا انا وشي جاب 60 لون و اتسمرت في مكاني و مبقتش عارفة انطق و ده كان من اوسخ المواقف اللي اتحطيت فيها فحياتي كلها ... و مش فاكرة ساعتها غير اني شمرت ايدي وقلتله عنك انت يا باشا انا هخليه يعترف ابن الوسخة ده
و انقلب الموقف اننا اللي بضرب الراجل وعلاء بشندي و اعضاء حملتي بيحوشوني عنه !!
دي شهادة مكانش ينفع اقولها زمان لاني كنت بخاف لكن دلوقت خلاص اعلنت ندمي علي صمتي و هبتدي اتكلم يوميا عن كل اسرار النكسة اللي عشتها لحظة بلحظة في منطقتي التحرير و مع اعضاء حملتي اللي شهدوا معايا نفس الاحداث
والصورة دي بعد الواقعة ماحصلت و بعدها اخدنا التصريح ونزلنا نشرف علي الاستفتاء
رحيمة الشريف