على صفحة كلنا خالد سعيد على موقع التواصل الاجتماعى -فيس بوك- نشر كريم ابراهيم قصتة مع سرقة عربيتة وكيف قام بأستراجعها ، وهذا نص ماكتبة:
كنت في العجمي الخميس والجمعه اللي فاتو قولت افسح مراتي وبنتي يومين في قريه ظلال النخيل 6 اكتوبر الكيلو 21 ,, القريه عليها امن وبوابات وكل عماره فيها حارس
صحيت قبل صلاه الجمعه لقيت عربيتي KIA CERATO مش موجوده ,, سئلت الحارس قالي انا افتكرتكو مشيو ,, رحت الاول علي جهاز المدينه ابلغ قالي اطلع علي النقطه طلعت علي النقطه قالي اطلع علي قسم العامريه اول ..
رحت القسم وعملت بلاغ وخدت نمره امين شرطه طبعا بعدت ما اديته فلوس عشان يتابع معايا لو في جديد
طبعا الكلام قبل الفلوس اتغير عن بعد الفلوس : الكلام كان من نوعيه اه طبعا يابيه هنجبهالك وهنكلمك وهنعمل وهنسوي ,, اديته في ايده مبلغ وقلتله بقولك ايه قولي الخلاصه ..
قالي بص ياباشا بصراحه لو الحرامي كلمك اتفق معاه علي مبلغ وحاول تنزل فيه وروح ادفع , لأن العربيه دي مش هترجع ولو رجعت هيبقي بعد 6 ولا 7 اشهر وانت وحظك .. لو نزلنا حمخله لازم تصريح من الوزير لان بيبقي عندنا فاقد وناس بتموت مننا ومنهم والكلام ده بياخد وقت ف اول ما الحرامي يكلمك رد عليه واتفق معاه ورجعها احسن
قلتله طب هوه مين اللي خدها ,, قالي العرب بتوع الساحل نزلو حمله وسرقو 11 عربيه امبارح من القريه ( وفعلا كان في ناس كتير اوي بتعمل محاضر ) قلتله طب مانتو عارفين المكان ومين اللي عاملها ..
قالي يابيه اللي يخش جوا ياطلع بالعربيات وكام واحد من الافراد يموت ,, يا الكل يموتو لان هناك لغتهم الرشاش
خرجت من القسم وحزنت اني عملت محضر اصلا لما حامي الحمي بيقولي لما الحرامي يكلمك خلص معاه ,, يبقي انا من حقي اشيل سلاح واامن نفسي والشرطه ولاليها وجود في البلد ولا ليها دور مجرد خيال مأته وكل همهم بس يحبسو العيال اللي بتحدف طوب علي المدرعات في المظاهرات
المهم ابتديت اعمل دواير اتصالات وخدت نمره كذا حرامي وكلمت ناس منهم فيهم واحد قالي مش شغال في الCERATO وفيهم واحد قالي لسه مجاتش عندي اصبر لحد 10 هتكون اتسجلت
وساعدني اني اكمل في القصه دي ان واحد اتسرقت عربيته وخدت نمرته من نفس الشارع اللي ساكن فيه في اكتوبر دفع مبلغ ورجعتله العربيه
وفعلا لقيت الساعه 9 ونص الحرامي بيكلمني وبيقولي عاوز 35 الف ونزلنا الفلوس بعد كده ,, بمساعده احد ظباط الجيش جيبنا واحد عرباوي دخل وسيط وخدني لجوه في الجبل في طريق برج العرب جوه بتاع 10 كيلو في الصحراء ولفينا 5 اماكن وكلها عيون بتراقبنا ودفعت الفلوس وخدت العربيه
طبعا كان كلام الحرامي انهم مش حراميه وان العيال بتوع البودره جابوهالو وهوه اشتراها منهم بمبلغ وعاوز المبلغ ده لكنه مش حرامي
اهل البلد جوه كلهم بدو وكلهم عيون للحرامي وعربيات تلف علينا وترجع كذا مره والعربيه رجعت فاضيه من جوا مفهاش غير الكراسي اصلا بس الحمد لله علي كل شئ !
عموما دي قصتي وانا بقول حسبي الله ونعم الوكيل في الشرطه ووزير الداخليه قبل ماقولها للحرامي
طبعا اللي يعرف يركب جهاز فصل الكهرباء في عربيته يركبه ,, الانذار ملهوش لزمه اوي لانهم بيكسرو القزاز وبيفكو الكونتاكت وبيدورو العربيه .. كمان الكلبش اللي بيمسك في الفرامل ملهوش لزمه اوي .. يعني !! خدوا احتياطكو وخلاص والحرامي لسه عنده عربيه سوناتا وعربيه فيرنا !! ربنا يسهل ويرجعو لاصحابهم !
المصدر : كلنا خالد سعيد
Karim Ibrahim
| 
أهلاً بك ضيف | RSS